夫子迷津（5）：大暑流汗等於排毒減肥？老夫子：你當自己係臘肉定係鹹魚呀？

夫子迷津（5）：大暑流汗等於排毒減肥？老夫子：你當自己係臘肉定係鹹魚呀？

大暑天時，烈日當空。老夫子坐喺茶餐廳飲緊羅漢果茶，大番薯滿頭大汗推門入嚟，成身濕晒。

【大番薯】：嘩！老夫子你仲坐喺度歎冷氣？出面成37度，我行咗一陣出咗成身汗，成個人即刻輕咗成磅，爽呀！聽講出汗就係排毒減肥，我打算晏晝再去跑多轉，蒸多啲出嚟！

【老夫子】：（放下茶杯，皺眉頭）大番薯，你當自己係臘肉定係鹹魚呀？曬到出晒油就以為自己瘦咗？

【大番薯】：吓？唔係啫，健身教練都話「汗係脂肪嘅眼淚」，流多啲汗就等於燒多啲脂肪喎！

【老夫子】：哼！《黃帝內經》講「陽加於陰謂之汗」。汗係身體嘅津液所化，係心之液嚟㗎！你流嘅絕大部分係水份同電解質，唔係脂肪。你體重輕咗，只係水分流失，飲返杯水即刻打回原形。亂咁暴曬狂流汗，反而會傷陰耗氣！

【大番薯】：吓？咁我呢幾日成日覺得頭暈暈、攰攰哋，口乾到飲極水都唔掂，係咪就係你講嘅「傷陰」呀？

【老夫子】：終於識諗啦！今日係大暑，全年陽氣最盛、氣溫最高嘅日子。《黃帝內經》話「春夏養陽」，唔係叫你曬到變人乾！夏日養生要「清熱不忘養陰，祛濕先要健脾」。你流汗流到口乾舌燥、攰到冇力，係陰虛火旺嘅徵兆，再曬落去分分鐘中暑。

【大番薯】：咁……點算好呀？唔通大暑就唔郁得？

【老夫子】：郁，但要識郁！中醫提倡夏日運動揀清晨或黃昏，出微汗就得，唔好大汗淋漓。運動完要補充水份，最好飲溫水加少少鹽，養陰生津可以煲「西瓜翠衣蓮子茶」或者「綠豆沙薏米水」。記住：唔係流得汗多就代表健康，而係要「微微汗出，身心通暢」先係養生之道。

【大番薯】：明喇！即係要出汗，但唔好出到成條人乾咁。咦，咁茶餐廳嗰碗綠豆沙，我而家飲唔飲得呀？

【老夫子】：（微笑）適量可以，不過記住——綠豆沙清熱解暑，但脾胃虛寒嘅人唔好食太多，加兩片陳皮一齊煲就冇咁寒涼，仲可以健脾化濕添！

---

陳澤鵬博士 · 中醫養生小貼士：大暑養生關鍵係「清暑熱、健脾胃、養陰津」。每日飲足夠暖水，運動揀清晨或傍晚，出薄汗即止。煲湯可加冬瓜、薏米、荷葉，簡單又有效。