大家平時睇古裝宮廷劇，最常見嘅橋段一定有呢一幕：某個妃嬪突然作嘔作悶，太醫御醫即刻去到，拎條絲巾隔住個手腕，雙眼一合、手指定定咁放喺寸關尺上面。幾秒鐘之後，太醫就跪低大嗌：「恭喜皇上，賀喜皇上！娘娘喜脈，而且係個龍胎啊！」

每次睇到呢度，相信大家都會覺得中醫把脈真係神乎其技，好似識讀心術咁。作為一個執業中醫師，喺臨床上真係見過唔少病人，一坐低伸隻手出嚟，就用一種期待又神秘嘅眼神望住我，好似想考我牌咁問：「醫師，你幫我摸吓，睇吓我有冇咗？同埋係仔定女？」

每逢遇到呢個時候，我都只能夠無奈地笑笑口同佢哋講：「煲劇唔好太認真，我哋係行醫，唔係變魔術啊！」

究竟乜嘢係「喜脈」？中醫理論咁樣講

首先，我哋要還原基本步，從中醫药嘅正統理論去睇，所謂嘅「喜脈」，喺中醫學嘅脈象入面叫做「滑脈」。《瀕湖脈學》入面形容滑脈係「往來流利，如盤走珠」，即係話個脈象跳動得好流暢、好圓滑，好似有一粒粒圓滾滾嘅珍珠，喺你手指底下面「跲、跲、跲」咁滑過。

點解懷孕會有呢種脈象呢？從中醫嘅氣血理論去解釋，呢個係因為「血聚於下，氣鼓於上」。女性懷孕之後，全身嘅陰血會集中去到衝任二脈，用嚟滋養子宮入面嘅胎兒。既然大量嘅氣血要調動去養胎，孕婦體內嘅血流量就會增加，氣血運行得非常澎湃。心主血脈，心臟就要加速工作，將呢啲充沛嘅氣血泵去全身，反映喺手腕嘅寸口脈上面，就形成咗呢種流利、充實嘅「滑脈」。

所以，喜脈（滑脈）係真實存在嘅，亦係中醫診斷懷孕嘅其中一個重要參考指標。

滑脈唔等於懷孕！呢幾種情況一樣會「走珠」

不過，重點嚟啦！大家千祈唔好將「滑脈」同「懷孕」直接畫上等號。中醫嘅世界講求「同病異治，異病同治」，同一個脈象，喺唔同人、唔同時間出現，代表嘅生理或者病理意義可以完全兩回事。除咗大肚婆之外，以下呢幾種情況，你嚟把脈，一樣可以摸到非常標準嘅滑脈：

 1. 消化不良（食積）：

中醫話「脾胃為後天之本，氣血生化之源」。如果你食得太飽、食咗好多油膩嘢，或者本身脾胃運化失職，導致食物堆積喺腸胃（食積）。呢個時候，人體為咗幫手消化，氣血會大量湧向脾胃。中醫理論叫「邪氣盛則實」，胃氣與濕盛相搏，脈道充盈，就會出現滑脈。

 2. 月經前夕：

 好多女仔喺經期前幾日，去把脈都會出現滑脈。因為月經前，女性體內嘅氣血開始向沖任兩脈匯聚，準備排血。呢種氣血充盈嘅狀態，同懷孕初期嘅機理非常相似，所以脈象一樣會變得流利。

 3. 痰濕、痰飲， 內停：

體型比較豐滿、或者體質多「痰濕」嘅人，體內水液代謝唔好，濕氣凝聚成痰。痰濕阻滯體內，氣血要用力衝過去，脈道被充實，亦會摸到滑脈。

 4. 青壯年嘅正常生理現象：

如果你氣血非常旺盛，平時熱愛運動，身體強壯，你嘅脈象本身就可能偏向滑利。呢個屬於「平脈」（正常脈象），代表你精力充沛，絕對唔係有咗！

反過嚟講，如果孕婦本身有嚴重嘅貧血、氣血兩虛，或者有流產先兆（中醫叫胎漏、胎動不安），佢體內嘅氣血根本唔夠，咁就算佢真係懷孕，你都未必摸得到滑脈，反而可能會摸到細脈或者澀脈。

至於生仔定生女？

咁古書有冇記載把脈知男女呢？確實係有嘅。例如《醫宗金鑑》有話：「左疾為男，右疾為女」，或者「左大為男，右大為女」。古人認為，左手大、跳得快代表動能強，屬陽，所以係仔；右手大、跳得快屬陰，所以係女。

但做人要講科學、講求真。喺古代，無超音波、無驗血，大夫們只能透過呢啲經驗去推測，準確率其實同你猜枚、擲骰子差唔多，得五成機會。盲目相信中醫單憑三隻手指，就能夠100%斷定懷孕兼知男女，真係古裝劇睇得太多啦！

總結：

中醫治病、診斷，從來都唔係單靠一隻手。我哋講求嘅係「四診合參」望、聞、問、切。把脈（切診）只，係最後一環，佔咗四分之一炸！

如果我要幫一個病人診斷係咪懷孕，除咗把脈，我一定要「望」佢嘅神色面容、「問」佢嘅月經周期有冇推遲、有冇出現「惡阻」（即係孕吐、揀擇食嘢、容易攰）、仲要「聞」佢嘅聲音氣味。結合晒所有資訊，再配合埋現代醫學嘅驗孕棒或者超音波（B超），咁先係最安全、最負責任嘅醫療態度。